Sürme-i hat nergis-i gûyâyı hâmûş eylemez
Sâki-i âşûb mahmûrun ferâmûş eylemez
Zevk-bahş-ı hâb-ı nûşin fikr-i la'lindir senin
Gül-şekersiz kahveyi erbâb-ı dil nûş eylemez
Edemez kesb-i safâ âyîne-i endâm-veş
Ol ki bir kez yâri ser-tâ-pâ der-âgûş eylemez
Zâhid-i rubeh-firîb eyler riyâ sahbâya lîk
Etdiği bîdâdı nukl-ı meclise mûş eylemez
Mürde diller sensiz ey rûh-ı revân peymâneyi
Şîre-i cân ile leb-rîz etseler nûş eylemez
Şeh-levend-i feyz çıkmaz seyre tâ kim sâkiyâ
Bâde-i gül-rengi rahş-ı câme zin-pûş eylemez
Çok zamândır peyker-i tîğ-i zebânından Nedîm
Hûn-ı nazmın tâze deryâlar gibi cûş eylemez