Fuzuli - Gazel (Ey mezâk-i câna cevrin şehd ü şekker tek lezîz)

 

Ey mezâk-i câna cevrin şehd ü şekker tek lezîz
Dem-be-dem zehr-i gamın kand-i mükerrer tek lezîz

Âteş-i berk-i firâkın nâr-i dûzah tek elîm
Cür’a-i câm-i visâlin âb-i kevser tek lezîz

Şerh-i ahvâlim sana meste nasihat kimi telh
Telh güftârın bana mahmûra sâğar tek lezîz

Dağ-i aşkın derdi zevk-i saltanat tek dil-pezîr
Hâk-i kûyın seyri feth-i heft kişver tek lezîz

N’ola bulsam zevk köydürdükçe göğsüm üzre dağ
Ehl-i derde dâğ olur bi-derde ziver tek lezîz

Tâze tâze dâğ-i derdindir dil-i sûzânıma
Fi’l-mesel hırs ehline cem’iyyet-i zer tek lezîz

Ey Fuzûlî âlemin gördüm kamu ni’metlerin
Hiç ni’met görmedim didâr-i dil-ber tek lezîz

(Fâîlâtün Fâîlâtün Fâîlâtün Fâîlün)