(aleyhiefdalüssalevât)
Ukde-i ser rişte-i râz-ı nihânîdir sözüm
Silk-i tesbîh-i dür-i sebalmesânîdir sözüm
Bir güherdir ki nazîrin görmemişdir rûzgâr
Rûzgâra âlem-i gayb armağanıdır sözüm
Rûzgâr ihsânımı bilmiş benim yâ bilmemiş
Âleme feyz-i hayât-ı câvidânîdir sözüm
Ehl olan kadrin bilir ben cevherim medh eylemem
Âlemin sermâye-i deryâ vü kânıdır sözüm
Bîaraz bir cevher-i sâfîdir ammâ muttasıl
Ehl-i tabın zîver-i tîg u sinânıdır sözüm
Yanî ki endîşesencân-ı cihânın dâimâ
Hem sarîr-i kilki hem vird-i zebânıdır sözüm
Bir benim gibi cigerdâr ehl-i tab olmaz dahi
Cevher-i tîg-ı kazâ-yı nâgehânîdir sözüm
Gamze-i dilber nola reşk eylese endîşeme
Hırz-ı bâzû-yı dil-i sâhibkırânîdir sözüm
Ol kadar pür şîvedir gûyâ ki bikr-i fikrimin
Gamze-i merdefgen-i nâmihribânıdır sözüm
Ol kadar dildûzdur gûyâ ki bir şûh âfetin
Nâvek-i müşgîn kemân-ı ebruvânıdır sözüm
Âyet-i nûn velkalemdir mushaf-ı sînemde yâ *
Rüstem-i endîşemin tîr ü kemânıdır sözüm
Bir gülistândır hayâlim dil şüküfte bülbülü
Ol gülistânın latîf âb-ı revânıdır sözüm
Bir şebistândır hayâlim hâme zengî hâdimi
Ol şebistânın arûs-ı dilsitânıdır sözüm
Âferiniş tûtî-i endîşeme bir dâmdır
Ki o dâmın dâne-i pür imtinânıdır sözüm
Kimse inkâr edemez mâhiyyet-i endîşemi
Ehl-i reşkin nüsha-i akd-i lisânıdır sözüm
Âfet-i aynülkemâl-i reşk kâr etmez bana
Def-i zahm-ı çeşm-i Hallâk-ı Maânî’dir sözüm
Hâk-i pâyım sürme eylerse aceb mi rûzgâr
Unsur-ı rûh-ı Kemâl-i Isfahânî’dir sözüm
İşte Hallâk-ı Maânî şimdi geldi âleme
Gûş edin âsârını ki tercümânıdır sözüm
Sonra gelsem dehre Hallâk-ı Maânî’den nola
Kâleb-i huşk-i hayâle rûh-ı sânîdir sözüm
Nüktede âlem harîf olmaz bana gûyâ benim
Her ne söylersem cevâb-ı lenterânîdir sözüm **
Her ne söylersem kazâ mazmûnunun isbât eder
Anı bilmez ki hıtâb-ı imtihânîdir sözüm
Ben ne Keşşâf’ım ne sâhib keşf ammâ manada
Mûşikâf-ı nüktehâ-yı âsumânîdir sözüm
Binde bir manâyı nazm etmem yine bir lafz ise
Yoklasan mecmûa-i râz-ı nihânîdir sözüm
Hâsid-i keçrev hayâle râst gelmezse nola
Ehl-i dil yârâne her dem yâr-ı cânıdır sözüm
Ben cihânârâ şehenşâh-ı cihân-ı manayım
Sözlerin de pâdişâh-ı kâmrânıdir sözüm
Dönse şemşîr-i hatîbe nola şemşîr-i zebân
Mülk-i nazmın hutbe-i emn ü amânıdır sözüm
Tabının bir tercümân-ı ter zebânıdır kalem
Hâmemin bir hemzebân-ı nüktedânıdır sözüm
Pâsbân olmuş bir ejderdir kalem genc-i dile
Ki o gencin şebçirâğı-ı pâsbânıdır sözüm
Tâ sabâh-ı haşre dek bin mübtelâyı mest eder
Bezm-i aşkın neşve-i rıtl-ı girânıdır sözüm
Rind-i huşyârım harâbât-ı muhabbettir dilim
Âşık-ı hercâîyim vahdet nişânıdır sözüm
Olalı peygamber-i âhır zamâne naatgû
Âb-ı rûy-ı ümmet-i âhır zamânîdir sözüm
Naat-ı şâhenşâh-ı evreng-i nübüvet ki anın
Feyz-i medhiyle dilin cân-ı cihânıdır sözüm
Cân-ı âlem fahr-ı âdem Ahmed-i mürsel ki tâ
Haşr olunca naatgûy u naathânıdır sözüm
Olalı gavvâs-ı deryâ-yı hayâl-i midhati
Cevherî-i tabımın zîb-i dükkânıdır sözüm
Ol kadar el verdi manâ feyz-i evsâfiyle ki
Gûyiyâ miftâh-ı genc-i şâygânîdir sözüm
Maşrık-ı subh-ı hidâyettir senâsiyle dilim
Mihr-i kudsî pertev-i kevkebfeşânıdır sözüm
Kevkebefşân âfitâb olmazsa ger ol maşrıkın
Ikd-ı pervîn-i güsiste rîsmânıdır sözüm
Başlasam mirâcını tahkîke âb u tâb ile
Gevher-i şehvâr-ı gûş-ı Ümmühânî’dir sözüm
Addolunmaz mucizâtı hadden efzûn neylesin
Gerçi ki bir râvî-i muciz beyânîdir sözüm
Gerçi ben dûrum cenâbından hele şükrüm budur
Çehrefersâ-yı cenâb-ı âstânıdır sözüm
Nefîyim endîşe-i naat ile oldum kâmyâb
Nâmurâdân-ı cihâna müjdegânîdir sözüm
Hâkpây-ı naat gûyânım ki arş-ı azamın
Zikr ü tesbîh-i lisân-ı kudsiyânıdır sözüm
Şâdkâm oldum neşât-ı feyz-i naat-i pâk ile
Şimdiden sonra duâ-yı şâdmânîdir sözüm
Tâ ki manâ-yı latîf ü lafz-ı rengâmîz ile
Rûzgârın bir dilârâ dâstânıdır sözüm
Her dem endîşemden olsun rûhuna yüz bin selâm
Arşa dek îsâle peyk-i râygânîdir sözüm
* Hokka ile kaleme yemin olsun (El-kalem Sûresi 68/1).
* (Allah buyurdu) : Beni asla göremezsin! (El-a’râf Sûresi 7/143).