Âlemin gördüm ki ebr-i feyz-i bârân üstüne
Şevk müstevlî tamâm eczâ-yı ekvân üstüne
Mihr-i devlet baht-ı erbâb-ı dile âyînedir
Perde-keş subh-ı vatan şâm-ı garîbân üstüne
Zîr-i ran fersân-ı nazma tevsen-i tünd-i felek
Sâyebân perr-i hümâ erbâb-ı irfân üstüne
Şimdi sahbâ-hâne-i irfândadır rûh-ı neşât
Cân verir muğ-beççeler telkîn-ı îmân üstüne
Nazm-ı rengîndir gül-i rûy-ı sebed bu meclise
Şimdi dîvanlar müreccahdır gülistân üstüne
Can-fezâ geldi çü bûy-ı pîrehen hâtırlara
Uğramış var ise râh-ı şevk Kenʿân üstüne
Germ edüp yek-rengî-i ülfet gül ü pervâneyi
Âşiyân-sâz oldu bülbüller şemaʿdân üstüne
Sîr-i meh-tâbiz fürûğ-ı bahtdan bî-hûde mihr
Etmesin tahmîl-i minnet mâh-ı tâbân üstüne
Âsman nüh tûy bir çarhî siper der-pîş eder
Şeyh seng-endâz-ı taʿn oldukça rindân üstüne
Sûk-ı istiʿdâda şehr-âyîn edüp yârân-ı nazm
Etdiler gül-rîzler âvîze dükkân üstüne
Her biri bir şeb-çerâğ-ı ârzûdan muktebes
Her biri pervâne bir şemʿ-i fürûzân üstüne
Hâsılı seyr ederek bu hırmen-i feyzi yine
Sabr bâr oldu dil-i âşüfte-sâmân üstüne
Ben dahı bir bezm-i nûş-â-nûş tertîb eyleyüp
Harf atardım sâkî-i meh-rû-yı fettân üstüne
Şevk ile tarf-ı külâh eşkeste vü hâtır-dürüst
Dîdeler hayran hat-ı câm-ı dırahşân üstüne
Elde mey divân-ı Câmî vü Neşâtî der-miyân
Beyt okurken şîve-i nâhid-i şahşân üstüne
Râsihin bu matlaʿın tazmîn edüp sâkî-i kilk
Nukl sundu çekdiğim sahbâ-yı irfân üstüne
Süzme çeşmin gelmesin müjgan müjgân üstüne
Urma zahm-ı sîneme peykan peykân üstüne
Nergis-i gül-gûn beyâzın sanma surh etmiş remed
Gamze-i zâlim yine kan eylemiş kan üstüne
Tîğ-i âteş-renge arz etmiş dil-i mecrûhunu
Müjdeler ey cân-be-kef nâr indi kurbân üstüne
Sünbülistân-ı hatın fikriyle her şeb tâ seher
Göz döner bin kerre bir hâb-ı perîşân üstüne
Kişver-i hüsne aceb âşûblar düşmüş yine
Çekmiş ebrû hançer ol ber-geşte müjgân üstüne
Halvet-i sâfî-zamîran hâne-i âyînedir
Sıklet olmaz gelse de mihmân mihmân üstüne
Tarf-ı hatda turresi bir ukde peydâ eylemiş
Gûyiyâ sah çekmiş âsaf pençe-fermân üstüne
Âsaf-ı İskender-âyîn ü hakîm-i hurde-bîn
Fâ'ik olmuş zâtı Hâkânî vü hâkan üstüne
Sadr-ı mülk-ârâ Ali Pâşâ-yı rûşen-re'y kim
Şemʿinin pervâne-veş hurşîd lerzân üstüne
Şekl-i pervin sanma tevkîʿin yazar bircis-i çarh
Lâcüverd-endûde bir levh-i zer-efşân üstüne
Çehresinden rengi pervâz eylemiş sanman şafak
Heybet ü iclâli düşmüş mihr-i rahşân üstüne
Kevkeb-i âlisin idrâk edemez erbâb-ı fen
Etseler vazʿ-ı rasad tâ çarh-ı hâmân üstüne
Ol sipeh-sâlâr-ı Kisrî-şan ki istiksâr eder
Bir sipâhî bendesin taht-ı sipâhân üstüne
Lerze düşmüş savlet-i kûh-ı vekârından tamâm
Arz-ı Nişâbûr-veş iklîm-i İrân üstüne
Hâk-i pâyinden varup bâd-ı sabâ tarh eylemiş
Sürmesinden gerd-i kesâd-âsâ Sıfâhân üstüne
Kûr eder der-ceng-i evvel dîdesin gerd-i haşem
At salsa hışm ile Sâm u Nerîmân üstüne
Hiç selâmet yakasın görsün mü düşmen kim kodı
Kahrı bin ser-pençe her târ-ı girîbân üstüne
Nîzesin tîr-i sebük-pervâza eyler pîş-rev
Rezmde gelse o rahş-ı berk-cevlân üstüne
Düşmeni hayretle hem-çün rubeh-i tasvîr eder
Şîr-veş geldikçe ol kûh-ı hırâmân üstüne
Rû-nümâ çîn-i cebîninden bile sîmâ-yı lutf
Hüsn-i diger bahş eder mevc âb-ı hayvân üstüne
Gül-nihâl-âsâ mutarrâ berkler peydâ eder
Assalar taʿvîz-i lutfun nahl-i mercân üstüne
Âsafâ deryâ-kefâ sammah-ı Hâtem-masrafâ
Mübtenîdir tıynetin ifzâl u ihsân üstüne
Pây-müzd olmaz berîd-i müjde-i eltâfına
Katsalar mahsûl-i bahri hâsıl-ı kân üstüne
Şeyh u şâbı eylemiş fermânına zîr-i nigîn
Zâtını taʿyîn eden kürsî-i dîvân üstüne
Devr-i ikbâlinde yokdur hiç harâb olmuş meger
Mey-güsârânın süre gâhî kadeh-rân üstüne
Pür eser nîsân-ı lutfun şöyle kim dür-pûş olur
Çeşm-i âşık nem-çekân oldukça dâmân üstüne
Şuʿle-i idrâk kim tabʿın güher-bâr etmede
Gûyiyâ berk-i cehândır ebr-i nîsân üstüne
Tabʿ-ı gevher-bâra vermiş rağbetin feyz-i sühan
Mihrdir kim pertevin salmış Bedahşân üstüne
Devletinde böyle bir şemşîr-peyker nazm ile
Şerha çekdim sîne-i gül-berk-i handân üstüne
Maʿnî-i rengîne her bir beyti gûyâ selsebil
Cesr her mısraʿı âb-ı laʿl-i rümmân üstüne
Gerçi teng oldu zemînin sen de ammâ kim Nedîm
Çarhı teng etdin ser-i hussâd-ı yârân üstüne
Laʿl ü mürvârîd-i daʿvâtı nisâr et baʿd-ezîn
Nev-arûs-ı tâliʿ-i düstûr-ı zîşân üstüne
Tâ ki cedveller çeke hatt-ı şuâʿ-yı mihrden
Münşi-i kudret bu nüh tûmâr-ı imkân üstüne
Mısrâʿ-ı berceste-i ikbâl ola serlevhası
Maʿdelet bâbında dâ'im tâk-ı eyvân üstüne