Ruhiddin Komilov - Millatim uygʼon

 

Bu dunyoga kimlar kelib kim ketmagan,

Odamizotga molu-dunyo hech yetmagan,

Turkiy boʼlib tarqoqlikni tark etmagan,

Ey millatim uygʼon endi gʼaflatdan tur!

Аmir Temur, Аlisherlar oʼtmish endi,

Boyazid-u, barlos sherlar oʼtmish endi,

Maqtanishmas asl erlar oʼtmish endi,

Ey millatim uygʼon endi gʼaflatdan tur!

Аjdodlaring goʼrlarida tik turmasin,

Bolalaring boshi egik, xam yurmasin,

Kelajaging Orol kabi qurimasin,

Ey millatim uygʼon endi gʼaflatdan tur!

Befarqligu-loqaydlikni qilma odat,

Аdolatdan afzal emas hech ibodat,

Hurfikrning natijasi bu saodat,

Ey millatim uygʼon endi gʼaflatdan tur!

Sheʼrlarimni bitdim asl sherlar uchun,

Bellarida belbogʼi bor erlar uchun,

Turkiyzamin deb atalmish yerlar uchun,

Ey millatim uygʼon endi gʼaflatdan tur!