Gör kadd-i yâri serv-i çemân söylerim sana
Bak ol dehâna râz-ı nihân söylerim sana
Sorma peyâm-ı laʿlini peymâne duymasın
Ey dil tehâlük etme amân söylerim sana
Ben şâʿirim o kâmet-i mevzûnu doğrusu
Sevmem desem de belki yalan söylerim sana
Vardır huzûra söyleyecek bir sözüm onu
A'dâ kaçan uyur o zamân söylerim sana
Söylenmez ol perî ile seyr-i Hisârımız
Zann etme ey dil onu hemân söylerim sana
Hamdır dü zülfi zülfe-veş onunla bil hemân
Ey bâd-ı subh işte nişân söylerim sana
Eylerse bana dahı nazar ol hidiv-i ahd
Hem-çün Nedîm sihr ü beyân söylerim sana
Seyr eyledikçe dâiresin der sipihre mihr
İzz ü vakâr u haşmet ü şan söylerim sana
Feyz-i nesîm-i lutfu ile gül-sitânda gül
Gûyâ deyüp durur ki hemân söylerim sana
Tâ cebhen üzre nakş ederim vasfın âkıbet
Ey âftâb işte ıyan söylerim sana
Mirrîh heybetini görüp der pesend ile
Şekl-i melekde şîr-i jiyan söylerim sana
Ey meh rikâbı ol da gör ikbâli ben bunu
Her vakt u her zamân u her an söylerim sana
Hiç bir nişâne yok o miyân u dehândan
Âgâh olursam ey dil ü cân söylerim sana
Bir kaşı yaya çille-keş-i âh imiş Nedîm
Ammâ o şûhu bâri cüvân söylerim sana