Bana Sultân Selîm-i kâmver kâm-ı cihân verdi
Bütün dünyâ deger bir genci has u raygân verdi
Ne genc ammâ ki her bir cildi gerdûn-i pür-envâr
Bu hâk-i bî-karâra nüh-tıbâk-ı âsumân verdi
Nice eyyâm idi hasretdim ol gencine-i gaybâ
Keremler kıldı el-hak kerâmetden nişân verdi
Hudâ alîmdir ancak şüphesiz keşf-i zamîr etdi
Hilâfet hükmün ol zıll-ı ilâhî bî-gümân verdi
Aceb bir mesnevî-i pür-bahâ kim Cevrî hattıyla
Dil-i uşşâk-ı zâra cevr-i gerdûndan emân verdi
Müşa’şa’ şemse-i cild-i mutallâ-yı zer-endûdu
Nigâh-ı raIbete envâr-ı mihr-i zer-feşân verdi
Edip nutk-ı hümâyûn hem okunsun deyü uşşâka
Ne hoş manâda himmet eyledi sûretde şân verdi
Sezâdır gülgül etsem ma’nîi-i rengîni vasfında
Hezâr-ı tâb-ı bî-samanâ solmâz gülistan verdi
Erişdirsem revâdır kuvvet-i pervâzı lâhûta
Hümâ-yı himmeti hem besledi hem âşiyân verdi
Beni irşâd edip gösterdi hakka meslek-i Hakkı
Ulûm-ı keşfi söyler bir kitâb-ı hoş beyân verdi
Hüseyn Baykara bahş etmemişdi Monlâ Câmi'e
Bana ol kâmı kim bu hüsrev-i sâhib-kırân verdi
Ne hüsrev mehdî-i sâhib-zamân kim adli âfâka
Safâ-yı meşrebînden revnâk-ı Nüşirevân verdi
Nesîm-i itidâl-i adli Hızr-ı rûzgâr oldu
Riyâz-ı devlete ahkâmı feyz-i câvidân verdi
Cihânda kalmadı bir olmadık memnûn-ı ihsânı
Civânâne temekkün tâb’-ı pîrâne tüvân verdi
Yoluyla tutdu tanzîm-i umûr-ı dîn ü dünyâyı
Sırât-ı müstakîme re’y-i hâs-ı pâsbân verdi
Bu tertîb üzere âgâz eyleyip tecdîd-i erkâna
Esâs-ı dîne istihkâm-ı gülzâr-ı cinân verdi
Husûsa cânib-i Monlâyı Rûm a gûş edip meylin
Sadâ-yı âferini zümre-i kerrubîyân verdi
Egerçi hubb-ı Monlâ şîve-i adl-âverândır hep
Velî hakk-ı edâsın bu hidiv-i nüktedân verdi
Hilâl olmuşdu Mâhı şems işrâkiyle bedr etdi
Gürûh-ı Mevleviye mâkdemiyle tâze cân verdi
Bu manâ rûh-ı Mevlânâdan ilhâm oldu bî-şüphe
Bîze râh-ı hidâyet gösterir hükm-i iyân verdi
Ne yapsın Gâlib-i bî-tâb evsâfına kâsırdır
Edip tatvîl nâzmı korkum oldur ki usan verdi
Safâsın ömrün efzûn ede Mevlâ mâksadın hâsıl
Ki zîrâ da’î-i dîrîneye baht-ı cüvân verdi
Duâm oldur Hudâ-yı lem-yezel her mâtlâbın versin
Bana her mâtlâbım zîrâ o şâh-ı kâmrân verdi