Absurdni hayotdan ma’ni axtarib charchaganlar o’ylab topgan.
Yulduz har kungi odatiga aylangan ishi- xonaki gullariga suv qo’yar edi. Bir me’yorda jildirab oqayotgan suv ovozi juda yoqimli tuyular, u shu ovozning telba oshig’i edi. Yuvinish xonasida jo’mrakdan suvni jildiratib ochib qo’yib eshitib o’tirardi. Ba’zan bu ermak soatlab davom etar, Yulduzning o’zi esa vaqt o’tganini ham sezmasdi. Ammo u holat boshqa mana bu “bir hayot” qarshisida turib eshitish boshqa edi (Ayniqsa bu “hayot”ga o’zing hayot baxsh etgan bo’lsang ikki hissa zavq). Bir qo’lida gullarga suv qo’yadigan idish ikkinchisida telefon bilan deraza yonida xushhol turardi. Ammo oraga sovuqchilik tushganidan beri o’tgan bir oy ichida biror marta qo’ng’roqlashmagani- Boburni eslab yana kayfiyati tushdi. Yulduz o’ziga tanish raqamlarga tikilgancha unga qo’ng’iroq qilgan taqdirda nima deyishini o’yladi.Va Boburni ilk ko’rgan, tanigan kunini esladi. O’sha kungi yigitning og’ir tushkunlikdagi ruhiy ahvolini eslash uni bundan battar ayblarini kechirishga sabab bo’la olardi. (Albatta, achinish- ayol kishining ojiz tomoni)
Shuning uchun ham o’rtadagi
kelishmovchiliklarni chetga surib
qilmagan aybi uchun uzr so’rashga shaylanib turardi. “Axir, men nima uchun
yonida bo’lishni istagandim, bir dardiga yana ming dard qo’shish uchunmi?” deb
xayolidan o’tkazdi u. Gullarga idishdan bir me’yorda suv quyilar bundan gul barglari
yanada yashnayotgandek tuyilardi Yulduzga. Uzoq chaqiruvdan so’ng narigi tarafdan
intiqib kutilgan javob bo’ldi.
-
Bugun
havo ajoyib-a? … Buni sezish uchun ko’z va burun ochiq bo’lishi kerak!-
charaqlab kulib yubordi u.
-
Yuring,
anhor bo’yiga boramiz… Bular shunchalik o’xshamagan bahonalarki, yolg’onni
eplolmasligingiz kulgimni qistatadi.
Boburning javobi qanday bo’lishidan qat’iy nazar o’sha
joyda ko’rishiladigan bo’ldi. Bir necha soatdan so’ng Yulduz ko’p qavatli
uylardan birining temir eshigini ehtiyotlik bilan ochib-yopdi. Shundoqqina
eshikning yoniga o’rnatilgan eski, to’rt kishi bemalol joylasha oladigan
yog’och o’tirg’ichda millati rus bo’lgan kampir Anastasiya Osipovna- Nastya
buvi o’tirardi.
-
Barakalla,
mana bo’larkan-ku sekinroq yopsa. Qachon qarasa sharaqlatib yopib ketasanlar.
Axir, bu jamoat mulki, hammaga hali uzoq yillar xizmat qilishi kerak,- dedi u
Yulduzga.
Nastya buvi yuzlarini ajin bosgan, og’zida
nomigagina bir-ikkita tishi omonat osilib turgan, och yashil ko’zlari
ich-ichiga botib ketgan, bukchaygan bir kampir edi. U yolg’iz o’zi yashar, umri
qishin- yozin ko’chada yo shu qadrdon o’tirg’ichida yig’ib yurgan yelim idishlari
qurshovida o’tardi. Yulduz uni yolg’iz zerikadi, ba’zan odamlarga qiladigan
qo’pol muomalasining sababi mehr-e’tibor yetishmasligidan deb o’ylab uzoq-uzoq
suhbatlashib o’tirardi. Hozir shoshib turgani uchun salom-alikdan nari o’tmadi.
O’zi bilan olib chiqqan yeguliklarni ko’chadagi mushuklar uchun qo’yilgan
maxsus idishlarga solib metro tomon yo’l oldi. Metro- kimdir tushib kimdir
chiqib ketadigan arzon va qulay joy. Yulduz metroning bir-biridan farq qiluvchi
uslubda bezatilgan bekatlarini tomosha qilib chiqarkan unga “Baxtli muzey” deb nom
bergandi. U bu yerda avval bekatni tomosha qilar keyin odamlarni kuzatardi.
Muzeylardan ko’ra metroning “baxti”- har kuni minglab odamlarning kirishida edi.
Ayni paytda ham metroda odamlarni tomosha qilib ketar, ularning orasida tik
turgan holda ketayotgan juftlik e’tiborini
tortdi. Ular bir-biridan ko’z uzmasdan, metro shovqiniga qaramay suhbatlashib
turishar, so’zlari eshitilmay qolsa bir-birining qulog’iga aytishayotgan edi. Vagonlar
silkinishida yiqilib ketmaslik uchun qiz yigitga suyanib olgan, tashqaridan
qaralsa, bir-birining pinjiga tiqilib
ketayotgandek taassurot uyg’otardi. Butun olam metro va faqat shu ikkisidan
iboratdek bamaylixotir, kulishib ketishar, atrofdagilarning o’g’rincha
nigohlariga e’tibor berishmas edi. Yulduz esa o’sha o’g’ri nigohlarni kuzatib
o’tirdi. “Baxtli insonni ko’rganda artofidagi odamlar qanday qaraydi? Mana ular
ko’z o’ngingda: mehrsiz, havassiz, so’nik. Ko’rayotgan ko’zlarim bari
bir-biridan farq qilsa ham bir xilda boqadi. Bu ko’zlar birovning baxtidan
yonish baxtidan mosuvo… Muhabbatning asl ta’mini ko’zlari bilan totganlar
borki, yonida shunday boqadigan insoni bo’lishini ich-ichidan xohlaydi. Bu
odamlar esa o’zida yo’g’ini boshqada ko’rgan baxil singari qarashardi. Agar omading
chopmasa, tushkunlikka tushsang ular astoydil mehribonchilik ko’rsatishlari
mumkin ammo… baxtliliging uchun kechirolmaydilar. Ayni paytda odamlarning ko’z
qarashidan shunday xulosaga kelgan Yulduz ikki yoshdan boshqa hammaga achindi.
Bu kayfiyat uni to Bobur bilan ko’rishmagunicha tark etmadi. Uni ko’rgach o’sha
lahzagacha bo’lgan hamma narsani unutdi. Anhor bo’yiga daraxtlarning kuzgi barglari
olovrang gilamdek to’shalgan, suv g’oyatda tiniq edi. Atrof odamning hislari
bilan o’ynashish darajasida go’zal manzara kasb etgan edi. Ikkisi ham o’rtada
hech bir gap so’z o’tmagandek, kecha bir-biriga xayrli tun tilab xayrlashgan
oshiqlardek turardilar. Yulduz shoshilib kiyinganidan sochlarining bir qismi paltosining
ichida qolgan, buni o’zi payqamagani uchun Bobur uning sochlarini ehtiyotkorlik
bilan palto yoqasidan chiqarib qo’ydi . Bu Yulduzga xush yoqdi va unga faqat
ikkisigagina ma’lum, yodga olganda o’sha lahzalar sururi yuzga olov bo’lib
uradigan nimalarnidir eslatib yubordi. U Boburning ham esiga tushdimikin degan
o’y bilan ko’zlariga tikildi. Ammo qizargan, ich-ichiga botib ketgan, osti
ko’kargan ko’zlardan o’zi istagan iliq hech bir ifodani topolmadi. Yulduz shu narsani suhbat mavzusiga aylantirayotgani
Boburning g’ashiga tegardi.
-
Uyqusizlikdan
hammasi. Boshqa hech gap yo’q.
-
Shu
vajga o’zingiz ishonsangiz bo’ldi, men emas.
-
Kel, kelishib olaylik. Bugun bir-birimiz
aytgan gaplarga to’la ishonamiz. Hech bir savol va isbotsiz. Xo’sh, rozimisan?
-
Albatta!
Men o’zi doim sizga shunday ishonib kelganman.
Bobur seskanib ketdi. Ancha joygacha indolmay,
o’zini o’ng’aysiz his etib bordi. So’ng o’z ahvolidan g’azablanib, o’zini qo’lga
olishga tirishdi.
-
Biz
Dilbar bilan yarashganmiz. Hozir u bilan uchrashyapman.
Yulduz beixtiyor yurishdan to’xtadi.
-
Qachondan
beri? – dedi Boburga hayron boqib.
Bir paytlar u Boburning sobiq sevgilisi bilan yarashib
ketishini astoydil istagan edi. Ammo undan keyin ancha suvlar oqib o’tgan,
munosabatlari oqimi ikkisi ham kutmagan o’zanga burilib ketgandi. Endi Yulduz
ularning yana birga bo’lishini tasavvuriga ham sig’dirolmasdi.
-
Usiz
yasholmasligimni anglab yetganimdan beri.
-
Men-chi?-
bolalardek soddagina so’radi Yulduz.
-
Sen…
sen bilsayding hozir qay ahvoldaligimni.
Ikki o’t orasidaman.
-
Tushunaman.
-
Sen
shunchalar yaxshisanki, o’zing bilmaysan ham buni. Men esa bir tola sochingga
ham arzimayman. Oliyjanobliging, pok sevgingga loyiq emasman, hech qachon
munosib ham bo’lolmayman. To’g’ri, seni orzularingni amalga oshirish
ko’zalaringda quvonch ko’rish uchun qo’limdan kelganini qilmoqchi edim, ortig’i
bilan qila olardim ham, lekin…
-
Bilaman.
-
Senga
uylanib baxtli qila olaman, ammo sevolmayman. Dilbarni bilarding, uni sevaman,
ammo uylanolmayman. Ana shunday xudo urgan, ko’nglini quli, betayin odamman.
Kechirasan…
-
Endi
nima qilmoqchisiz?
-
Bilmayman,
sen ayt nima qilay?
-
Dilbarga
uylaning.
-
Seni
xafa qilishdan ko’ra qo’limni chopib tashlash kamroq og’riq beradi menga.
-
Siz
uchun sevgingizdan kechish darajasida qadrli ekanligimni o’zi menga yetarli.
Esingizdami, bir-birimizga hech bir sabab va manfaatsiz baxtli lahzalarni hadya
etishga kelishgandek, yonimizda shunday insonimiz borligi uchun o’zimizni
boshqalardan omadliroq sanardik. Hamon kelishuv o’z kuchida. Unga uylaning.
-
Men
unday qilolmayman.
-
Arosatda
yashashdan azobliroq hayot yo’q. Umr qisqa- baxtli yashashga ulgurib qolishingiz
kerak…
Yo’lning bir tomoni katta anhor, ikkinchi
tomoni bir qator ekilgan daraxtlar. Qilt etgan shamolga ham daraxtlarning
barglari ko’p-ko’p to’kilar, to’kilmoq payti kelgan barglarga shamol bahona
edi. Yulduz kechga tomon uyiga qaytarkan uzoqdan Nastya buviga ko’zi tushdi. U
yelim idishlar bilan ichi to’la juda katta qopni orqalab, xursand bo’lganida
aytib yuradigan eski qo’shiqni ming’irlab ketayotgan edi. Yulduz kampir ortidan
biroz kuzatib turdi-da so’ng uyga kirib ketdi. Uy qanday holda tashlab ketilgan
bo’lsa shunday turar, birga yashaydigan sherigi hali qaytmagandi. U xonasiga
kirdi-yu ichkaridan qulflab oldi. Ayni paytda u hech kimni ko’rishni ham
eshitishni ham istamasdi. Allamahalgacha ko’ziga uyqu inmadi. Chalqancha
yotgancha, shiftga tikilib o’y surdi. O’tgan butun hayotini esladi. Negadir
undan faqat yomon xotiralar, yo’qotishlar, ko’zyoshlar, iztiroblar chiqib
kelaverdi. Boshiga chidab bo’lmas
darajada og’riq kirdi. Endi uxlolmasligini bilar, uxlash unga yordam bera
oladigan yagona najot edi. Ammo… Yulduz ortiq o’z-o’zini bir uxlab turish bilan
davolashni istamasdi. U o’rnidan turdi, boshi aylanib ko’ngli behuzur bo’lib
yana o’tirib qoldi. Vaqtni aniq bilmasa ham taxminlab yarim kechadan o’tgan
bo’lsa kerak deb o’yladi. Etlari sovuqdan junjikdi, shundagina deraza ochiq
qolganiga e’tibor berdi.
Amallab
deraza yoniga yetib borib uning
shamol o’ynoqlayotgan yupqa pardasini bir zarb bilan tortib uzdi. Pardani katta
kuch bilan tortgan Yulduz o’z kuchini boshqarolmasdan polga o’tirib qoldi.
Biroz vaqt o’tirgan holda pardani qo’llarida tutib, silab, yuzlariga,
bo’yinlariga surtib mayinligidan bahra oldi, hatto tabussum ham qildi. Bu
tabassum biram shirin, samimiy ediki, bunday jilmayishni faqat suyuklisiga o’z
ixtiyori bilan o’zini topshirgan qizlar qila olardi…
Yulduz
deraza ostiga o’rnatilgan eski temir isitgichning “qovurg’alari” orasidan pardaning
ikkinchi uchini o’tkazib bog’ladi. Avval noziklik bilan so’ngra yechilmaydigan
qilib bir necha marta qattiq tugdi.
Biroz o’tib esa ko’p qavatli uyning qaysidir pardasiz derazasidan qorong’i kechani yoritmoqchi bo’lgandek oq bayroq uzun sochlar bilan o’ynashib shamolda hilpirab turardi.
Hiç yorum yok:
Yorum Gönder