Soyup ten pûstın cândan dilâ ‘uryân-ı ‘aşk olsam
Muhabbet tekyegâhında bu gün kurbân-ı ‘aşk olsam
Gülistân olsa âhir sîne gül gül tâze dâgıyla
Halîl-âsâ harîk-i âteş-i sûzân-ı ‘aşk olsam
Düşerdüm hançer-i yâr üstine sabrum gidüp ol dem
Eger bezm-i belâda mest-i ser-gerdân-ı ‘aşk olsam
Göñül dir kim yanup nâr-ı muhabbetle ten-i hâki
Fenâ hâkisterinde ahker-i pinhân-ı ‘aşk olsam
‘Atâyî-veş yürürdi şehr-i gamda sikke-i eşküm
Muhabbet kişverinde ben de bir sultân-ı ‘aşk olsam
Mefâîlün / Mefâîlün / Mefâîlün / Mefâîlün
. - - - / . - - - / . - - - / . - - -