Şebângeh kim irüp hengâm-ı lutf-ı Hazret-i Mevlâ
Ferah-bahş u neşât-engîz idi şâm-ı visâl-âsâ
Meger bahr-ı sefîd rûz-ı cezr ü medd 'ayân itdi
Güherler zâhir oldı huşk olup ol bahr-i gevher-zâ
Giderdi cevşen-i sîmîn ile şemşîr-i zerrînin
Zemâne giydi altun tügmeli telli siyeh hârâ
Şihâb ögine zencîrin çeküp leşkergeh-i çarhuñ
Fitilin yakdı funduk hâzır itdi encüm-i garâ
Kırıldı rişte-i tesbîhi sandum pîr-i gerdûnuñ
Şihâb oldukca encüm arasında nâ-gehân peydâ
Varaklanmış gıdâdur hokka-ı çarh içre gûyâ kim
Nola te’sîr iderse hâke necm-i âsumân-pîrâ
Degül encüm beyâz-ı rûz-ı kecdür zâil oldukda
Görindi kâh-ı zerdiyle binâ-yı köhne-i dünyâ
Nola hamâm-ı nüh-tâk-ı sipihr olursa pür-zulmet
Mu'allâ kubbesine hurdedür ol câmlar zîrâ
Felek târ-ı şu'â'ından fitîle bükdi hurşîdüñ
Uyardı şâm irince sad-hezârân şem'-i bezm-ârâ
Gazâle gitdi sür'atle sipihrüñ sebzezârından
Degül encüm nişân-ı pâyi kıldı câ-be-câ ammâ
Güm oldı Yûsuf-ı Mısr-ı sipihrüñ sâ'-yı zerrîni
Tolınca gendüm encüm ile zarf-ı târem-i vâlâ
Murassa' câmı destinden düşüp mihrüñ şikest oldı
Tagıldı safha-ı çarh üzre nice gevher-i yektâ
Sikender-vâr idince mihr-i seyr-i bahr-ı zulmâtı
Çıkardı taşra vâfir şeb-çerâg-ı encüm-i zehrâ
Musahhar eyledi şâh-ı kevâkib mülket-i şâmı
Sipâhından pür oldı yine gök meydânı ser-tâ-pâ
Niyâmına kodı zâl-i felek şemşîr-i hurşîdi
Görinen kabza-ı sîmînidür anuñ hilâl-âsâ
Hilâlüñ sandalın aldı içine keşti-i gerdûn
Temevvüc eyleyüp çün kim karardı lücce-i hardâ
Dönüp cerm-i kamer çarh üzre kandîl-i firûzâne
Fitîl itmiş hilâli aña sun'-ı kudret-i Mevlâ
Ya hod bir şem'dür yanmış soñı bir şu'le kalmışdur
Vücûdın hân-kâh-ı 'aşk içre eylemiş ifnâ
Semâ içre feleklerden düşer bî-hûş olup encüm
Meger kim leyle-i mi'râcı gerdûn eyledi ihyâ
Bu şebdür nakş-ı encümle zer-efşân sünbül-i müşgîn
Bu şebdür dürr ü gevherle müzeyyen turra-ı havrâ
Bu şeb olındı da'vet mahrem-i esrâr-ı hamiyet
Bu şeb oldı o hazret dayf-ı mihmân-hâne-i esrâ
Yegâne hâce-i kül ser-firâz-ı zümre-i kümmel
Sır-ı ehl-i tevekkül mühr-dâr-ı künzü lâ-yafnâ
Şeh-i Yûsuf-cemâl-i tahtgâh-ı mülk-i mahbûbî
Cem-i gerdûn-celâl-i bârgâh-ı kurb-ı Ev-ednâ
Meh-i burc-ı risâlet âfitâb-ı 'âlem-i sûret
Dür-i dürc-i nübüvvet pâdişâh-ı kişver-i ma'nâ
Çerâg-ı nûr-ı Yezdânî delîl-i feyz -i Rabbânî
Rumûz-âmûz-ı Kur’ânî muhît-i gevher-i takvâ
Cenâb-ı Hazret -i Levlâk tâc-ı târik-i eflâk
Resûl-i Hâlık-ı pâk âfitâb-ı evc-i isti'lâ
Nebiyy-i müctebâ Ahmed mu'allâ-pâye ced-ber-ced
Delîl-i devlet-i sermed habîb-i Kâdir-i yektâ
Ol şehen-şâh-ı a'zam ol medâr-ı hilkat -i âdem
Ki anuñ müjde-i teşrîfidür dünyâ vü mâ-fihâ
Cemâl-i tâb-nâki matla'ü’l-envâr-ı Kuddûsî
Derûn-ı sâf u pâki mahzenü’l-esrâr-ı Mâ-evhâ
Nem-i rûy-ı mutarrâsı huceste kevkeb-i dürrî
Ham-ı ebrû-yı zîbâsı mübârek gurre-i garâ
Yüzi dermânde-i şâm-ı zalâle neyyir-i a'zâm
Sözi üftâde-i çâh-ı günâha 'urve-i vuskâ
Felek hân-ı nevâlinde kemîne kâse-i Çînî
Kamer râh-ı celâlinde şikeste sâgar-ı mînâ
Biri gird-âbdur biri cezîre bahr-ı fazlında
Bu Nîlî kubbe-i gerdân ile bu tûde-i garbâ
'Aceb mi ümmetinden olmag içün nâzil olursa
Ki gökde aradugın yirde bulur Hazret-i 'İsâ
Meh-i bedr ol habîbüñ mübtelâ-yı sîne-çâkidür
Siyâh itse nola gögsin dögüp 'aşk ile bî-pervâ
Bu bahr-i nîl-gûnda şeb-çerâg-ı mâhı şakk itdi
Dü-nîm itmişdi dreyâyı egerçi mu'ciz-i Mûsâ
Der-i gâr üzre dâm-ı 'ankebûtı kıldı Hak peydâ
O bir deryâ-yı rahmet üzre konmış ag idi gûyâ
Ocagına su koydı ehl-i küfrüñ geldügi sâ'at
Mecûsuñ âteşin tûfân-ı kahrı eyledi itfâ
Yagup bârân-ı rahmet seyl-i himmet şöyle geldi kim
Pül-i nâ-pâyidâra döndi tâk-ı gurfe-i kisrâ
Nola nahl-ı vücûd-ı pûd-ı pâki hâke sâye salmazsa
Olur mı safha-i 'âlemde misli bir dahi peydâ
Görürdi her tarafdan dîde idi cism-i pür-nûrı
Süveydâ-yı dil-i âgâhı oldı merdüm-i bînâ
Hatı âyât-ı rahmet rûyı Mushaf nâmı Tâhâ’dur
Misâl-i besmele üstinde ol ebr-i felek-fersâ
Beyân-ı mu'cizâtı mu'ciz-i ehl-i belâgatdür
Revâdur olsañ ey dil kıssa-ı mi'râc ile gûyâ
O şeb geldi berîd-i hoş-nüvîd-i hazret-i 'izzet
Getürdi hidmet-i peygambere bir rahş-ı bî-hemtâ
Nice rahş ol Burâk-ı berk-i seyr-i nâzenîn-cünbiş
Ferişe-hû perî-rû 'anberîn-gîsû melek-sîmâ
Sabâhü’l-hayr-ı garrâsı misâl-i matla'-ı hûrşîd
Sevâd-ı çeşm-i şehlâsı süveydâ-yı dil-i havrâ
Nesîm-âsâ varur bir lahzada etbak-ı eflâke
Butûn-ı seb'a-ı Kur’ân’da gûyâ kim dil-i dânâ
Şu deñlü tîz-rev kim varmadın sakf-ı habâba bâd
Bunuñ olur eñ ednâ cilvegâhı günbed-i hardâ
Nola itsem anı şeb-dîz-i âh-ı 'âşıka teşbîh
Ki varur bir nefesde kubbe-i gerdûna bî-pervâ
Binüp aña idince 'azm-i râh-ı menzil-i maksûd
Olur bir dem ikâmetgâhı sahn-ı Mescid-i Aksâ
İmâm olup sufûf-ı enbiyâya kıldı çün tekbîr
O gül-bang ile makhûr oldı kaçdı düşmen-i hûrâ
İmâmetde vücûdı bir güherdür der-kenâr olmış
Namâz içre o saflar oldı mecv-engîz bir deryâ
Namâzı çünki itmâm eyledi anlarla mescide
Virüp ol dem selâm itdi 'urûc-ı 'âlem-i bâlâ
Müşerref eyleyüp yirden götürdi anı lutfından
Ayagına sürüp yüz buldı sahre rütbe-i vâlâ
O demde tâk-ı 'arşa nûrdan bir reh-güzâr oldı
Şu'â'ın nerdübân itdi meger mihr-i cihân-ârâ
Alup ol bahr-ı ihsânı çıkardı evc-i a'lâya
Burâk-ı berk-rû deryâya inmiş ebr idi gûyâ
Peri pür-nûr Cibrîl aña zerrîn-gâşiye oldı
Burâkınuñ öñince oldı şol dem kim felek-sîmâ
Çıkup eflâke ol çeşm-i çerâg-ı 'âlem ü âdem
Zücâcî perdede çün merdüm-i çeşm eyledi me’vâ
Hilâl ol dem kenâr-ı mâha geldi itdi istikbâl
Sehâb-ı fazlına mîzâb-ı zerrîn eyledi peydâ
İdüp altun varaklar hall o şâhuñ yazdı târîhin
'Amûd-ı tâk -ı 'arşa kâtib-i dîvân-ı istîfâ
İrince feyz-i irşâdı kemânçe târını kırdı
Okın atdı kemânın yadsı ya'ni zehre-i Zehrâ
Çerâg-ı tekye-i çârûmdan alup nakd-i envârı
Degül encüm nisâr itdi yolına Hazret-i 'İsâ
Çalışdı bir başıyla düşmeni kahr itmege Behrâm
Bu meydânda kılıcı ile buldı rütbe-i 'ulyâ
Kılup dârü’l-emân-ı çarha sa'd-ı ekberi hâkim
Nizâmın buldı yümn-i tâli'iyle 'âlem-i bâlâ
Nühûset mi kalur hîç kevkeb-i keyvân-ı zengîde
Çün irdi hidmetine hazretüñ ol şeb Bilâl-âsâ
Basup kürsiye pây-ı himmeti devletle 'izzetle
'Urûc itdi firâz-ı 'arşa sultân-ı şeb-i isrâ
Süm-i esbinden ol dem urdı tamga atlas-ı çarha
Şeref virdi 'aceb mi olsa kadri cümleden a'lâ
Kenâr-ı sidre oldı müntehâ-yı seyri Cibrîl’üñ
O mâh-ı bedre itdi hâle gibi sînesin me’vâ
Turup rahşı o mevkifde yüz urdı pâyine Refref
O bâlâ hurmetiyle kaldı anda vâlih ü şeydâ
Meger kim hacc-ı ekber itmege taht-ı revân oldı
Harîm-i 'izzete anuñla vardı hâce-i Bahtâ
İrişüp Ka'be-i maksûda çıkdı bahr-i kesretden
Cüdâ oldı o dem Refref k’ola beytü’l-harem tenhâ
Ne Ka'be Ka'be-i vuslat ne vuslat 'âlem-i vahdet
Muhabbet nûrı lâmi' ser-be-ser beytü’l-harem tenhâ
'İbâretdür o dem 'aynü’l-yakînüñ iki nûnından
Makâmı Kâbe Kavseyn oldugı ol hazretüñ gûyâ
74.Kenâr-ı kurb-ı Ev-ednâ’ya varup gûş-ı cânıyla
Sadâ-yı cûşiş-i deryâ-yı nûrı eyledi ısgâ
Tekellüm her tarafdan anda bî-savt u hurûf oldı
Masûn oldı megesden ya'ni şehd-i ma'nâ-yı zîbâ
Salât-ı hamse kim terkîblenmiş tâc-ı devletdür
'Atâ kıldı o gice kullarına Hazret-i Mevlâ
Olup maksûdına vâsıl murâdı oldı çün hâsıl
Nüzûl itdi misâl-i pertev-i mihr-i cihân-ârâ
Bu hâli görmemişdür seb'a-ı seyyâre seyrinde
Ki bir demde cihânı devr ide bir neyyir-i vâlâ
Delâ’il var iken mi'râc-ı rûhânî diyen kimdür
Meger diye ser-â-pâ rûh idi ol zât-ı bî-hemtâ
'Atâyî ola mı vassâf-ı hazret olmaga lâyık
Varur mı rütbe-i nazm-ı kerîme şi'r ile inşâ
Garaz 'arz eylemekdür hâlüm ol dergâha sultânum
Kerîm olandan istimdâd idüp şâ'ir olur gûyâ
Siyeh-rûz-ı günâhum bu ümîdüm feyz-i lutfuñdan
Ki ola zulmet-i âb-ı hayât ol leyle-i zumlâ
Hemîşe tâ yaka bahr-i siyâh-ı zulmet-i şebde
Delîl olmagiçün fânûs-ı zerrîn-i meh-i garâ
Hidâyet nûrı ile güm-rehâne reh-nümâ olsun
Be-hakk-ı sûre-i pür-nûr Sübhânellezî esrâ
Ola dâ’im salât ile selâm ol şâha Mevlâ’dan
Salât ile selâm oldukca kâmil tâ-dem-i ferdâ
---------------
Mefâ'îlün / mefâ'îlün / mefâ'îlün / mefâ'îlün