Fuzuli - Gazel - 15 (Cânımıñ cevheri ol la’l-i şeker-bâra fidâ)

Cânımıñ cevheri ol la’l-i şeker-bâra fidâ
’Ömrümüñ hâsılı ol şîve-i reftâra fidâ

Derd çekmiş serim ol hâl-i siyeh kurbânı
Tâb görmüş tenim ol turra-i tarrâra fidâ

Gözlerimden dökülen katre-i eşkim güheri
Lebleriñden saçılan lü’lü’-i şeh-vâra fidâ

Çâk-i sînemde olan kanlu ciğer pâreleri
Mest çeşmiñde olan gamze-i hûn-hᵛâra fidâ

Pâre pâre dil-i mecrûh-u perîşânımdan
Ser-i kûyunda gezen her ite bir pâre fidâ

Cân ü dil kaydını çekmekten özüm kurtardım
Cânı cânâneye ettim dili dil-dâra fidâ

Ey fuzûlî n’ola ger saklar isem cânı ’azîz
Vakt ola kim ola bir şûh sitem-kâra fidâ

(Fe i lâ tün fe i lâ tün fe i lâ tün fe i lün)