Fuzuli - Gazel - 35 (Derd-i aşkım def’ine zahmet çeker dâ’im tabîb)

Derd-i aşkım def’ine zahmet çeker dâ’im tabîb
Şükr kim olmuş ana zahmet bana râhat nasîb

Bir zebândır şerh-i gam takrîrine her berg-i gül
Eylemez bî-hûde gül gördükde efgân andelib

Bilse zevkim vasldan firkatte efzûn olduğun
Vasldan men’im revâ görmezdi reşkinden rakîb

Ta’n-i gaflettir peri-tal’atlere izhâr-i hâl
Sanma kim ahbâb hâlinden olur gâfil habîb

Âh bilmen n’eyleyim kurtulmak olmaz kayddan
Ben harîf-i sâde-dil hûblar cemâli dil-firîb

Şem’ kurbile tefâhur kılma ey pervâne kim
Hırmen-i ömrün köyer berk-i fenâdan an-karib

N’ola ağlarsa Fuzûlî ravza-i kûyun anıp
Lâ-cerem giryân olur kılgaç vatan yâdın garib

(Fâ i lâ tün fâ i lâ tün fâ i lâ tün fâ i lün)