Аssalomu alaykum, aziz va muhtaram vatandoshlar!
Uzoq-yaqindan tashrif buyurgan hurmatli mehmonlar!
Siz, qadrdonlarimni, koʼpmillatli butun Oʼzbekiston xalqini barchamiz sogʼinib kutgan Navroʼzi olam bilan samimiy muborakbod etishdan baxtiyorman.
Bugun fasllar almashib, yeru koʼkda ilohiy moʼʼjizalar yuz bermoqda. Yangi kun, yangi mavsum, yangi hayot nafasi boshlanmoqda. Tabiat uygʼonishi bilan zimiston kechalardan zerikkan koʼngillar yasharib-yayramoqda.
Аlbatta, bugungi shodiyona bayramni el-yurtimiz bilan muazzam “Yangi Oʼzbekiston bogʼi”da oʼtkazishni niyat qilgan edik. Lekin hammamiz koʼrib turibmiz – soʼnggi kunlarda havo sovib, harorat biroz pasayib qoldi. Bugun obi rahmat yomgʼirlari bilan osmondan rizqu roʼz, qut-baraka yogʼmoqda. Hammamiz bu holatni shukronalik bilan qabul qilamiz.
Mana shu muhtasham saroyda turib, barcha-barchangizga eng ezgu va samimiy tilaklarimni izhor etishga ijozat bergaysiz.
Xush kelibsan yurtimizga, goʼzal Navroʼz!
Olam sen bilan nurga toʼlsin!
Sharqona Yangi yil hammamizga muborak boʼlsin!
...
Аziz va muhtaram vatandoshlarim!
Mana shu bahoriy lahzalarda barchamiz ulugʼ ajdodlarimizning tilaklariga qoʼshilib, ilohim, har kunimiz Navroʼzdek goʼzal, Navroʼzdek fayzli va mazmunli boʼlsin, deb niyat qilamiz.
Barchangizga sihat-salomatlik, yangi yutuq va zafarlar, oilaviy baxt va farovonlik tilayman.
Yurtimiz tinch, xalqimiz omon boʼlsin!
Navroʼzi olam barchamizga muborak boʼlsin!
Hiç yorum yok:
Yorum Gönder