Fuzuli - Kaside (Der Medh-i Hazret-i Şah-ı Velayet)

Gonce bağrı dehr bî-dâdiyle evvel kan olur
Sonra yüz lûtf ile gönlü açılır handân olur

Katre-i bâran ki bir müddet sadef hasbin çeker
Yok iken kadri tapar kıymet dür-i galtân olur

Dâne toprak içre şiddet çektiğiyçin nice gün
Baş çekip hırmenlenir ârâyiş-i bu-stân olur

Kahrdan ikrâh edenler lutfa olmaz müstahak
Müsta’idd-i derd olanlar kâbil-i dermân olur

Mihnette sabr eyleyen rahat tapar çün Yûsuf’a
Saltanat tahtının evvel pâyesi zindân olur

Ger rızâ olsa kazâya müşkil olmaz hîç hâl
Ârife sabr ile her müşkil ki var âsân olur

Fi’ldir asl-i rızâ-yi Hak ne kim asl ü neseb
Hâk-i ferman-ber beşer âsî melek şeytân olur

Sâyir-i mahlûktan bir kimse olsa pâk-dil
Ehl-i Beyt’in fırkasında sayılır Selmân olur

Hâh seyid hâh âmi kâm bulmaz bî-edeb
Fi’li müstahsen olan müstevcib-i ihsân olur

Yüz meşakkat çekse kâm-i dil tapar encâm-i kâr
Her kimin âlemde mevlâsı Şeh-i Merdân olur

Tâbi’i fermân eder hükmüne cümle âlemi
Murtaza hükmüne her kim tâbi’-i ferman olur

Tîre olmaz râst-rev ger çekse bend-i âhenin
Râst-rev tîr-i hadengin zîveri peykân olur

Ol Şeh-en şeh kim eger bir mûra kılsa iltifât
Mûr hükm eyler Süleyman üstüne sultân olur

Ol imâm-i dîn ü dünyâ kim anun düşmenliği
Müşrikin dînine vü dünyâsına noksân olur

Taş olur arslan eger kahr ile kılsa bir nazar
Hükm kılsa düşmanı kasdına taş arslan olur

Zerreî mihr-i ruhundan tapsa pertev âs-mân
Âs-mân üzre tamâm encüm meh-i tâbân olur

Feyz-i lûtfiylen eger insâna kılsa terbiyet
Kadr ile insan melek-nisbet azimü’ş-şan olur

V’er melek hem tapsa ayn-i iltifâtından nazar
Akl-i kâmil kesb edip elbette bir insân olur

Lutf u kahrından tapar mukbil atâ müdbir cezâ
Kat’u fasl-i hasr için ol lâhza kim dîvân olur

Kevser-i cennet anun hükmündedir bu vech ile
Bunca neslinden hemîn Âdem ana mihmân olur

Nûh sandığına keştî tek aparmıştır penâh
İhtiyât eyler ki nâ-geh bir dahi Tûfân olur

Gerçi İsmâ’il’e kurbân gökten inmiş kadr için
Hak bilir kadr için İsmâ’il ana kurbân olur

Mu’cizi bir gül-şen-i pâkizedir kim istese
Andelib ol gül-şene Dâvûd-i hoş-elhân olur

Her kim ihlâs ile hâk-i merkadinden zerreyi
Alsa anunla tabâbet eylese Lokmân olur

Dostu ger masiyet kılsa olur gufrân-pezîr
Düşmeni bin tâ’at etse mûcib-i isyân olur

Sâye-i lûtf ü kerem ger salsa hâk-i tîreye
Cirm-i hâk-i tîre reşk-i ravza-i Ridvân olur

Akl kim gavvâs-i deryâ-yi kemâl-i ilmdir
Cevher-i zâtın tasavvur eylese hayrân olur

Fehm kim seyyâh-i iklîm-i diyâr-i derkdir
Vâdi-i idrâkini seyr etse ser-gerdân olur

Devri anun âl ü ashâbından almaz rûzgâr
Devr anundur devr ilen her nice kim devrân olur

Kasr-i vasfının binâsın kılsa mi’mâr-i hıred
İzz ü câh ü devlet ü ikbâl çâr erkân olur

Ol sipihr-i devlet ü ikbâlden yüz dönderir
Devlet ü ikbâl her kimden ki rû-gardân olur

Var ümîdim feyz-i lûtfundan Fuzûlî kim müdâm
Tâ dilimde kuvvet-i nutk ü tenimde cân olur

Dem uram evsâf-i evlâd-i Alî’den kim müdâm
Mâdih-i Âl-i Alî müstevcib-i gufrân olur

Vezin: 

Fâilâtün fâilâtün fâilâtün fâilün