«Menem» diýen goç ýigide
Bir mynasyp ýar gerekdir.
Arap at, ýowly ýigide
Almaz zülpükar gerekdir.
* * *
Ýigit öler ýurt üstünde,
Janyn berip ar üstünde,
Goç ýigitler il üstünde
Namys bilen ar gerekdir.
* * *
Bäş gün köňül hoş etmäge,
Saçak ýazyp, nan dökmäge,
Abraý alyp, at etmäge,
Golda bendi-bar gerekdir.
* * *
Mekgä baran bolar hajy,
Aýralyk ölümden ajy.
Goç ýigide ar galyjy,
Aşyga didar gerekdir.
* * *
Artdyr pelek ahy-zaryn,
Alar elden ygtyýaryn.
Magtymguly, söwer ýaryn
Syýa zülpi tar gerekdir.
Hiç yorum yok:
Yorum Gönder