Muallâ dûd-mân-ı evliyâdır matbah-ı Monlâ
Dil ü câne ocağ-ı kimyâdır mâtbâh-ı Monlâ
Çerâğ-ı pür-ziyâsı sırr-ı Âteş-Bâzdan yanmış
Bütün pervânegân-ı 'ışka câdır matbah-ı Monlâ
Anâ rûh-sûdedir âteş-perestân-ı mâhâbbet hep
Semender-hâne-i mihr-ü vefâdır matbah-ı Monlâ
Çekilmişdir simât-ı ni’met-i elvân-ı âfâka
Halîl-i 'ışka gülzâr-ı safâdır matbah-ı Monlâ
Semâ’-ı dest-efşânı sanırsın nev-niyâzanın
Matâr-ı tâirân-ı kibriyâdır matbah-ı Monlâ
Yeter fakr ehline yüzler karası mâye-i râhmet
Makâm-ı hıdmet-i Âl-i Âbâdır matbah-ı Monlâ
Alır ehl-i velâyet kısmetin bir bir o dergehden
Kerâmet kânıdır kenz-i Hudâdır matbah-ı Monlâ
Nihâyet ibtidâya ric’at olmuş seyyidül kavme
Bakılsa zîr-i hatt-ı istivâdır matbah-ı Monlâ
Havâlanmâ sakın âvâre gezme aşiyân-gir ol
Kebûter-hâne-i sıdk u safâdır matbah-ı Monlâ
Giren müştâkdır ol dûd-mâne girmeyen müştâk
Misâl-i Kâ’be bir hayret-fezâdır matbah-ı Monlâ
Tecerrüd-pîşe derd-endişe lâzımdır taleb-kârî
Aceb germ-âbe-i ibret–nümâdır matbah-ı Monlâ
Yâraşmışdır gürûh-i Mevleviyye tavr-ı istiğnâ
Kanâ’atden yapılmış bir bînâdır matbah-ı Monlâ
Nefes-bend-hâmûşi bî-nevâyı üzre mebnîdir
Fenâ Fillâhdır ayn-ı bekâdır matbah-ı Monlâ
Tasârrufdan te’ârrüfden hezerân pâye ber-terdir
Bîlir ehli ne vâlâ mültecâdır matbah-ı Monlâ
Ubûdiyyet ibâdet sırf ubûdetdir o menzîlde
Sipihr-i bendegîye irtikâdır matbah-ı Monlâ
Dür ü gevherde mevcudâtda hişt ü seng i mermerde
Mükemmel bir serâ-yı dil-küşâdır matbah-ı Monlâ
Anun her dâne nârı bir enâr ü hârı bir güldür
Cefâ resminde bir bâg-ı safâdır matbah-ı Monlâ
Olup âdem safâsın sürmedim Gâlib o firdevsin
Dahı hâlâ gözümde tûtiyadır matbah-ı Monlâ