Şeyh Galib - Kaside ( Diger kaside-i mehtabiyye ber-evsâf-ı şâh- şehîd Sultan Selim Han-ı Salis rahmetullahi aleyh)

Bir ferve-i semûr giyib dûşe mâhtâb

Hidmetdedir o zülf ü bîna-gûşe mâhtâb

Deryâ-yı feyz-i âlem-i envâr olur iyân

Sahn-ı çemende başlayıcak cûşe mâhtâb

 

Bir bahr-ı şu’le-zâre düşüp sevk-i hüsn ile

Girmiş tamâm tavr-ı sivâyûşe mâhtâb

 

Yekreng-i îş edip şeb ü rûzûn bulur safâ

İmdâd ederse rind-i kadeh nûşe mâhtâb

Derviş-i Mevlevi gibi çarh-ı tehî midir

Devr etse feyz-i Şems ile bî-tûşe mâhtâb

 

Da’vâ-yı aşk-ı yârda noksânını bilip

Turmuş bu hankâhda deycûşe mâhtâb

 

Gördüm bu tâb u revnakı bildim ki bendedir

Âlemde bir hidiv-i güher-pûşe mâhtâb 

 

Dârâ-yı mihr-i kevkebe Sultân Selîm kim

Hırmen-geh-i mevâline bir hûşe mâhtâb

 

Etdikde neşr-i nûr o şeyh-i hâver-i kerem

Çevgân olur önündeki çâvûşa mâhtâb

 

İtlâf-i nakd-i encüm eder bendegâhına

Yüzler sürünce giydiyi pâ-pûşe mâhtâb

Ayîne-i zamîr-i tecelli-fürûzunun

Benzer yanında hâb-ı feramûşa mâhtâb

 

Adliyle zulm-i sâbıkı mâhv etse çok mudır

Razı olur mu hükmü karâkûşa mâhtâb

Hebnem gedâ-yı gülşenîdir ol keremverin

Almış hevesle dâmenin âgûşa mâhtâb

 

Hemşîrinin ziyâsını vermek muhâldir

Sâgar-keşân-ı bezm-i halâlûşa mâhtâb

 

Tedbîr-i safî-veş veremez haşr-ı intizâm

Gark etse dehri penbe-i menfûşe mâhtâb

 

Lutfu sipihre oldugu dem zer-ferşân-ı cûd

Kapmış biraz kurâze-i mâgşûşe mâhtâb

 

Endîşe-i-nâk olup derecât-ı atâsına

Başlar hafî suhâyile ser-gûşe mâhtâb

Ehl-i hüner müsâdif-i re’y-i münîridir

Gösterdi şem’i bülbül-i hâmûşe mâhtâb

 

Gâlib duâ-yı devetin eyler o dâverin

Verdikçe neş’e âşık-ı bî-hûşe mâhtâb

 

Tevfîke re’yi râstgele geldiIi gibi

Dâim şeb-i Berât-ı perendûşe mâhtâb