Shukur Qurbon - Navro'z

Tun bilan tong erur tashbehda udum.

Аbdulla Oripov

Koʼkda parcha-parcha yulduz,

Sirli-afsunli dunyo.

Bir yulduz bor jahonda

Tong yulduzi-purziyo.

Qoʼllarida nurdan qilich,

Tillarida nurdan soʼz.

Tunga qarshi jangga kirar

Osmon aro shu yulduz.

Zulmatliklar rangi oʼchar,

Yuzlaridan qon qochib.

Bu yulduz yuksak uchar,

Qanotidan oʼt sochib.

Toʼkilgan qon toʼkilar

Huv ufqlar ortiga

Va quyosh chiqib kelar

Minib kunduz otiga.

Tun uzunmi? Kun uzun?

Qay biri qadrliroq?

Аlbatta, kun! Аlbatta!..

Lekin… tun qahrliroq!

Mashʼum yaldo tunida

Lahzalarga solar chang,

Onlarning koʼkragiga

Surkab chiqar qora rang.

Shamollarning qoʼshigʼi,

Deysan, nahot sim-siyoh?

Sim-siyohmi daraxtlar?

Sim-siyoh maysa-giyoh?!

Qop-qora soy shovullar

Shundoqqina yoningda.

Nogahonda dovullar

Uygʼonadi qoningda!

— Soy qorami? Qorami?..

Isyon joʼshar qoningda.

— Yoʼq, lojuvard! —

Hayqirar

Boshingda tong yulduzi!

Tundan uzun boʼlmoq shart

Bu dunyoning kunduzi!..

Yana jangga kirar u,

Qoʼllarida qilich-nur:

— Hey, zulmat, kuning bitdi,

Ming nola chek, ming oh ur!..

Qon toʼkilar, toʼkilar —

Huv ufqlar ortiga,

Va oftob chiqib kelar

Minib kunduz otiga!..

Bora-bora erta chiqib,

Kech botadi bu quyosh,

Yorugʼlik farzandlarin

Uygʼotadi bu quyosh.

Bora-bora koʼproq kular

Bogʼlar, bogʼlar havosi.

Bora-bora kengayadi

Yaxshiliklar safosi.

Bora-bora kichrayadi

Yolgʼonning boʼy-basti ham.

Bora-bora uzayadi

Haqiqatning dasti ham.

Navroʼz, sen shu sarhadda

Dunyoga kelgan farzand.

Sen — farzand jamoliga

Yorugʼ dunyo koʼngli band.

Bugun kecha va kunduz

Teng kelgan ulugʼ kundir,

Dunyo yaxshi-yomonga

Keng kelgan ulugʼ kundir.

Bugun uzun, bugundan

Ertangi kunduz uzun.

Ertangi kunduz aro

Yongan toʼgʼri soʼz uzun.

El-ulus shu boisdan

Koʼtargay seni boshda.

Uylarini tark etib,

Yayragay dala-dashtda.

Yuraklarning toʼrida

Bir-bir joʼyak ochurlar,

Qadr, mehr-muhabbat

Urugʼlarin sochurlar.

Eng anvoyi hislardan

Gulchambarlar toʼkilar,

Muhabbatning yam-yashil.

dostonlari oʼqilar.

Doshqozonlar osilib,

Oʼyin-kulgu boshlanar,

buni koʼrib, yomonlar

Jon-jahoni gʼashlanar…

Navroʼz, navroʼz, ogoh oʼl,

Dunyoda dushmaning koʼp.

Dushmaniga beparvo

Kimsaning pushmoni koʼp.

Chorla gʼofil gullarni,

Bogʼlarni chorla, navroʼz.

Yuraklar peshtoqida

Tugʼ boʼlib porla, navroʼz.