Şeyh Galib - Kaside (Bir kasr-ı 'âlî binâ olundukda sultân-ı müşârün ileyhaya takdîm olunan kasîdedir.)

Zihî kâşâne-i şâhâne kim reşk-i bahârândır

Zamân-ı ömr-i câvidân zemîni hâveristândır

O rütbe revnâk-efzâdır ki zerrîn tâk-ı vâlâsı

Meh ü mihr ile bu çarh-ı kebûd ol sakfa hayrândır

Hakîkat neş’esidir nakşının bûy-ı gülistânı

Meger esdâf-ı rengi sâgar-ı ser-şâr-ı irfândır

Nice pür-şîve olmâz nergîs ol bâg-ı tasvîrin

Elinde hâmesi Bihzâdının müjgânı hûbândır

Müzeyyen lâciverd ü lâ’l ile bir tâze kişverdir

Felek gûyâ ki ol kişverde bir kûh-ı Bedahşândır

Cevâhîr genci bir altun kafesdir zer-ger-i subha

Müzerkeş şemsesi müstaInî-i şems-i dırahşândır

Görenler mevc-i reng-â-reng tasvîrin bîlirler kim

Per-i tâvûs-ı cennet hâkrubî olsa şayândır

Yagar bârân-ı zer ol künbed-i fîrûzeden gûyâ

Der ü dîvârı her su selsebîl-i dürr ü mercândır

Bu âlî kasra keştî keştî gevheri nakl ederdi hep

Seped ber-dûş be-remz-i dûrîde deryâ-yı ummândır

Gül-i tasvîr-i bâgı öyle bir şehîd-i halâvet kim

Ana nisbetle müşgû-hâne-i zenbûr-ı nâlândır

Kumâş-ı ferş-i pâkî bâl-i simurg-ı ma’ârifdir

Harîm-i hâsına saff-ı sürûşan bâl-i murgândır

Tamâm ezhâr ü envâr ile bir bâg-ı mekârimdir

Veren bu bâga revnâk himmet-i Beyhân sultândır

Hezârân âferîn bu himmete bu revnaka ammâ

Anun da matlabı şevketle teşrîf-i Selîm Handır

Hebîstân eylese şevk ile şâyândır çerâgânı

Meh-ı ikbâle pertev veren ol mihr-i dırahşândır

Ne sultân hâher-i sa’d-ahteri hâkân-ı devrânın

Sipihr-i cûda bir-keffül hadîb-i cûd u ihsândır

O hâkân kim müceddid-sâz olup iklîm-i ikbâli

Cihân-ı köhneye ahd-i şebâb-ı feyz-i Yezdândır

O sultân kim zamân-ı nev-i bahâr-ı adl-i şâhîde

Yine deryâya râci’ bir musaffâ nehr-i cûşândır

O hâkân kim gubâr-ı âsitânı ehl-i tahkîka

Misâl-i sürme-i vakt-ı ziyâ-yı nûr-ı îmândır

O nûrûn pertev-i âsârı Gâlib ber-devâm olsun

Muhakkak bu duâ her rûz u şeb vird-i Çerâgândır