İstemem könlümni iylerde hayâl ol mâhını
Kim tahayyül birle seyr eyler n’iter hem-râhını
Könlüm ister ne diler min barın ey ay u kuyaş
Sizni könlü istemez ol kim diler dil-hâhını
Okı zahmın ten ara ol yüz hayâli yarıtur
Eyle kim Yûsuf cemâli rûşen itkey çâhını
Cân u akl u hûşdan keçgil dedin kıldım kabûl
Terk ite alman n’itey nezzâre-i geh-gâhını
Garka oldı nâtuvân cismim sirişkim bahrıda
Gerçi su nice tiren ola çumurmaz kâhını
Âşık irsen körmegil ey şeh gedâlarnı hakîr
Kim belâlık aşk fark etmez gedâ vü şâhını
Ey Nevâyî yâr eşigi pâklere kıbledir
Kılagıl köz kanıdan âguşte ol dergâhını
