Merhabâ ey hazret-i sâhibkırân-ı manevî
Nâzım-ı manzûme-i silk-i leâl-i mesnevî
Mesnevî ammâ ki her beyti cihân-ı marifet
Zerresiyle âfitabının berâber pertevi
Âlem-i manâ ki hûrşîd-i cihânârâ gibi
Devr eder girmiş semâa anda rûh-ı Mevlevî
Yanî sırrullâh-ı azam Hazret-i Mollâyı Rûm
Ki odur manâda sâhib mesned-i Keyhusrevî
Husrev-i endîşe ki aşk-ı Hüsâmeddîn ile
Oldu tîg-ı bâtınî dünyâya bürhân-ı kavî
Ol hudâvend-i serîr-i marifet ki feyzidir
Sâlik-i bîtûşe-i gümrâha zâd-ı uhrevî
Âklı nûr-ı cevher-i zât-ı şerîf-i Ahmedî
Nutkı mağz-ı rûh-ı enfâs-ı latîf-i İsevî
İlm-i vahdette sebakdâşı İmâm-ı evliyâ
Hikmet-i manâda şâkirdi Hakîm-i Gaznevî
Bir gülistân-ı müferrihdir dil-i pür feyzi ki
Ana rûh-ı Gülşenî’dir bâğbân-ı manevî
Dergüşâde yâ hazînehâne-i endîşedir
Anda çeşm-i Rûşenî’dir dîdebân-ı münzevî
Gevher-i güftârının kân müşterî-i müflisi
Kûçe-i esrârının hûrşîd düzd-i şebrevi
Feyz-i istidad-ı zâtın gör ki etmiş tâ ezel
Cezbesi hurşîd ü mâh ü âsmânı mevlevî
Nefî-i muciz beyânım bende-i Mollâyı Rûm
Ne Hakîm-i Gaznevî’yim ne Emîr-i Dehlevî
Hâk-i pây-ı Şeyh Attâr’ım ki oldu himmeti
Taıma üstâd-ı ders-i müşkülât-ı Mesnevî
Tohm-ı mihreş mî feşânem berzemîn-i cân u dil
Çûn mesel-bâşed ki her çîzî ki kârî bedrevî
Kâfiye teng oldı âgâz-ı duâ etsem nola
Gerçi zabt etmek ne mümkin hâme-i çâpükrevi
Tâ hisâb-ı mâh u sâl-i âlemi tahkîk için
Bedr ede mihr-i cihântâb-ı felek mâh-ı nevi
Her dem olsun rûh-ı pâkîne duâ-yı bîhisâb
Evliyâdan tâ ki hâlî olmaya dünyâ evi