Mâhzar- aşk-ı Hudâ Hâzret-i Mevlânâdır
Menba’-ı sıdk u safâ Hâzret-i Mevlânâdır
Serteser hükm eden iklim-i Fenâ Fillâha
Şâh-ı evreng-i bekâ Hâzret-i Mevlânadır
Nûr-ı irfâna dil-i pâki sipihr-i bâlâ
Meşrik-i şems-i Hüdâ Hâzret-i Mevlânâdır
Şeref-i zât ile mâşuk-ı gürûh-i ervâh
Gevher-i bahr-i vefâ Hâzret-i Mevlânâdır
Vâris-i ekmel-i sultân-ı rusül şâh-ı kerem
Hâtem-i tavr-ı sehâ Hâzret-i Mevlânâdır
Zâhid ü rinde füyûzât-ı kemâl-i sârî
Mültecâ-yı zu’afâ Hâzret-i Mevlânâdır
Hâk-i dergâhına rûh sûdedir efrâd-ı ricâl
Mürşid-i her dü-serâ Hâzret-i Mevlânâdır
Ağniyâ vü fukarâ bende-i dergâhıdır
Şâh-ı derviş-edâ Hâzret-i Mevlânâdır.
Enbîyâ sırrına mîras ile mâlikdir ol
Mazharül-ulemâ Hâzretil Mevlânâdır
Râhmet-i mahz-ı ilâhîden edip istimdâd
Mâye-i lutf u ata Hazret-i Mevlânâdır
Hâk-i pâyından alır kuhl ü cilâ ehl-i nâzar
Âleme nûr u ziyâ Hâzret-i Mevlânâdır
Âsitânından erer cânlara te’sîr-i hayât
Haste-i aşka şifâ Hâzret-i Mevlânâdır
Mesnevîdir nefes-i pür-meded-i rûhullâh
Dil-i bîmâra devâ Hâzret-i Mevlânâdır
Her iki mısra'ının mâ-hasalıdır dü-cihân
Kam-bahş-ı dü-serâ Hzaret-i Mevlânâdır
Cevher-i zâtı müberrâ-yı gubâr-" teşrîk
Ma’ni-i Nef-yi sivâ Hazeret-i Mevlânâdır
Nâyına şû’le-i âvâzına tût gûş-i kabûl
Tûr u Mûsa vü asâ Hâzret-i Mevlânâdır
Halka feyz-i ezeli bendelerinden erişir
Mebde-i cûd u recâ Hâzret-i Mevlânâdır
Hâk-i pâyından eder Gâlib ümid-i ihsân
Kân-ı iksîr-i duâ Hâzret-i Mevlânâdır