Sıdk ile mâ sadak-ı safâdır Sıddîk
Sîne-i sâf ile sadrü’l-hülefâdır Sıddîk
Sânî isneyn Muhammed dedi Hallâk-ı azîm
İz hümâ kavlini seyr et ne hümâdır Sıddîk
Bakdı tecrîdîne sükkân-ı semâ giydi hasîr
Ol kadar müntesib-i Âl-i Âbâdır Sıddîk
Bir velidir ki ”Velâ tahzen” ana oldu hitâb
Nass-ı Kur’ân ile mâkbûl-i Hudâdır Sıddîk
Zevki irfânı ile kıldı resûl-i tasdîk
Hüphesiz matla’-ı envâr-ı vefâdır Sıddîk
Yevm-i bedr aldı arîş üzre cenâb-ı Ahmed
Reşk-i şems ü kamer ü arş ü semâdır Sıddîk
İsm-i bâtından alıp feyz-ı zuhûru imdâd
Samt ile mürşid-i erbâb-ı Hudâdır Sıddîk
Sözü hemseng-i güher olduIuna şâhiddir
Sadef-i leblerin âheste küşâdır Sıddîk
Ehl-i red ile olan harbî delîl-i vâzıh
Hubb-ı Hakk hilât-i hassına sezâdır Sıddîk
Feth-i ebvâb-ı kerâmetidir el-yevm neser
Âşinâ-yı harem-i hass-ı vilâdır Sıddîk
“Ekrizullâhda” sermâyesinin etdi î’sâr
Sûreti-i müntehâb-ı fakr ü fenâdır Sıddîk
Me-arefnâ ki bak el-aczü anil idrâke
Bir niyâm içre meger tîg-i dü-tâdır Sıddîk
Etmeden mû’cize bürhânı taleb kıldı kabûl
Öyle bir müsteîd-i terk-i sivâdır Sıddîk
Pîşvâ bîlmeyen ol zâtı Müselmân olmâz
Lafz-ı tevhîde meger sûret-i Lâ’dır Sıddîk
Çâr-yâr ile olur beyt-i Hudâ çar- erkân
Ümredir anda Ömer ayn-ı Safâdır Sıddîk
Lafz-ı müminde odur mâ-sadaka-ı pîş-i zuhûr
Şeyh manâsına en akdem edâdır Sıddîk
Cedd-i a’lâsıdır ol Hâzret-i Mevlânânın
Mazhar ü müzhir-i esrâr-ı safâdır Sıddîk
Andan al himmet-i seyr-i melekûtu Gâlib
Sırr-ı mi’râc-ı resûl-i dü-serâdır Sıddîk