Esrar Dede - Na't-ı Nebi

Ey kitāb-ı ‘ilminiñ bir harfi dîvān-ı ḥikem

‘Aḳl-ı küll ‘indinde ṭıfl-ı nev-sebaḳḫān-ı ḥikem

On sekiz bin ‘ālemiñ ümmü’l- kitābından seniñ

Gūyiyā bir deste evrāḳ-ı perîşān-ı ḥikem

Rūḥ-ı ‘ulyāya kemāl-i ma‘rifet taḥṣîline

Āsmān-ı nüh-ḳıbāb oldu debistān-ı ḥikem

Çār aẓdād-ı muṭalsamdan edip fażlın ‘ayān

Rütbe-i ḥadd-i kemāle erdi erkān-ı ḥikem

Şāddır ol kāleb-i bāḳî-nümā fānî-edā

Kim edip ifnā-yı ṣūret oldu insān-ı ḥikem

Noḳta-i ḥarf-i vefādır ẕāt-ı aṣḥāb-ı vefā

Nüsḫa-i maṭlūbdur eṭvār-ı rindān-ı ḥikem

Noḳtadır ammā özü mecmū‘a-yı taḥḳîḳdir

Ẕātıdır ser-levḥa-yı tevḥîde ‘unvān-ı ḥikem

Noḳta kim sırr-ı derūn-ı ārif-i āgāhdır

Hep anıñ tefsîridir düşvār u āsān-ı ḥikem

“Kenz-i lā-yefnā” dil-i ‘ārifdedir kim aşḳdır

‘Aşḳ ism-i ẕāt-ı ẕāt esrār-ı irfān-ı ḥikem

Defter-i ẕātıñdan ancaḳ evvelîn ü āḫirîn

Noḳta-i vāḥid görüp eylerler i‘lān-ı ḥikem

Ma‘rifet ol rāzda ḥayretle ḳaldı mu‘terif

‘Aḳl-ı kül taḥḳîḳ edince oldu ḥayrān-ı ḥikem

Ẕerre-i mihr-i cemāliñdir ‘uḳūl-i enbiyā

Ḳatre-i baḥr-i kemāliñdir bu ‘ummān-ı ḥikem

Bir ṣadef çıḳdı o deryādan ki dildir ‘ālemi

Ḥāliyā etmekde ġarḳ-ı dürr ü mercān-ı ḥikem

‘Aḳl ol deryā kenārında ḫaẕef-pāre yatur

Mevcāsā ḫıyre-ser-fehm-i perîşān-ı ḥikem

‘Aḳlını bir şey ṣanıp idrākine ṣarf eyleyip

Oldu bî-çāre ḥakîm ol rehde nādān-ı ḥikem

Ba‘żısı ġark-ı ḍalāl ba'żı necāta erdiler

Çün hücūm etdi cihān-ı dîne ṭūfān-ı ḥikem

Keştîsi kalb-i selîm ü nāḫudāsı Nūh-ı cān

Olmalı kim kat‘ ola bu bahr-i cūşān-ı ḥikem

‘Aşḳdır her rāh-ı nūruñ müntehā-yı menzili

‘Aşḳdır maṭlūb-ı ḥāl ü ḳāl-i ‘irfān-ı ḥikem

‘Aşḳsız rūşen degil ma‘nā-yı ḥikmet ey ḥakîm

Şu‘le-i dil-sūzdur şem‘-i şebistān-ı ḥikem

‘Aşḳdan bî-behreler ‘allāme-i devrān iken

Oldular görmez misin meftūn-ı ṭuġyān-ı ḥikem

Olmasa mihr-i ḥaḳîḳat leyle-i ẓulmānidir

Āftāb-ı fażl dolsa ḫāveristān-ı ḥikem

‘Aşḳ ‘aşḳ ammā ḥuṣūlü ol şehiñ destindedir

Kim derinde çāker-i ‘irfān Süleymān-ı ḥikem

Olmayanlar müntesib dergāhına me’yūsdur

Ehl-i cem‘ ü neşre hep andandır iḥsān-ı ḥikem

Ṭālib-i işrāḳ-ı mihr-i ma‘rifet olduñ ise

Eyle mişkāt-ı nübüvvetden fürūzān-ı ḥikem

Eyle nîsān-ı sirişki ‘aşḳ-ı Ahmed’le nisār

Tā ki deryā-yı dil olsun gevher-efşān-ı ḥikem

Öyle Aḥmed kim lisān-ı ṣıdḳ-ı cümle enbiyā

Öyle Aḥmed kim me’āl-i nuṭḳ-ı pîrān-ı ḥikem

Feyżiniñ dil-zindesi Ḥıżr u Mesîḥ-i cāvidān

Teşne-i cām-ı peyāmı āb-ı ḥayvān-ı ḥikem

Fażl fażlıñdan kemāl aldı edip tekmîl-i nefs

Ma‘rifet bābında şākird idi Luḳmān-ı ḥikem

Ḥükmün Eflāṭūn ḳabūl etmezse bi’llāh ‘adl olur

Bir ġabiyyü’ẕ-ẕihn küll-i nābe-sāmān-ı ḥikem

Nutḳunuñ her nüktesi mecmū‘a-i cümle ‘ülûm

Dürr-i yektā-yı ḥadîs̠i ḥāṣıl-ı kān-ı ḥikem

Çār mecmū‘a kitāb-ı na‘tına beytü’l-ḳaṣîd

Çār unṣur bir rubā‘î medḥ-i sulṭān-ı ḥikem

Naẓra-i iḥsānına merbūṭ şühūd-i ma‘rifet

Cünbiş-i ebrūsuna merḫūn bürhān-ı ḥikem

Çāker-i dil-ḫāhı ḥall-i ‘aḳd-i esrār-ı ‘ülûm

Ġamzesiniñ bende-i fermānı fermān-ı ḥikem

Ḫalḳa-i gîsūsuna ma'ṭūf illā hūy-ı ‘aşḳ

Ebruvānı medd-i bismillāh-ı furḳān-ı ḥikem

La‘liniñ İlyās bir bîmār-ı iḥyā-kerdesi

Çeşmine maḥkūmdur ‘Īsî-yi devrān-ı ḥikem

Sāḥa-yı tevḥîdde el-ḥaḳ ẕebān-ı enṭaḳı

Dest-i Ḥaḳ’da seyf-i meslūl-i dıraḫşān-ı ḥikem

Sāye-i bî-sāye-i ẕāt-ı ḫudāvend-i ḥakîm

Maẓhar-ı ḫāṣṣ-ı vücūd-ı Ḫāliḳ-i cān-ı ḥikem

Olsa daḫı sāyesi hep ḳudsiyān yaġmalayıp

Eyler idi zülfüne ‘ıṭr-ı gül-efşān-ı ḥikem

Ẓıll-i envārı ‘uyūn-ı ġaybiyāna sürmedir

Şaḫs-ı ḳudsî sāyesi mir’āt-ı çeşmān-ı ḥikem

‘Aşḳınıñ āşüftesi aṣḥāb-ı temkîn-i kemāl

Ḥüsnünüñ dîvānesi ‘aḳl-ı cihānbān-ı ḥikem

Ey şehenşāh-ı rusül-‘asker ḫıdiv-i lā-mekān

Ẕāt-ı pākiñ zîb-i taḫt u tāc-ı dîvān-ı ḥikem

Süllem-i mi‘rācınıñ yek-pāresi taḫṣîṩ-i ẓāt

Defter-i i‘cāzınıñ her ḥarfi Ḳur’ān-ı ḥikem

Ṭȏb-ı teşri‘ ile çevgān-ı ḥikem1 maḥkūm sañā

Evvel ü āḫir seniñdür ṣaḥn-ı meydan-ı ḥikem

Ḥüsnünüñ Dāvūd olup bir na‘t-ḫˇān-ı muḫlisi

Şu‘be-gîṙ-i vaṣfıñ idi ol dem elḥān-ı ḥikem

Bunca sāl aḳdem ‘idād-i āsafānından idi

Enbiyā vü evliyā nükte-şümārān-ı ḥikem

Maṭlebim iḥsāndır yoḫsa degil ḫaddim benim

Vaṣfını ḥālā ederken her süḫan-dān-ı ḥikem

Ḫāme-i Mecnūn-edā bir bü’l-‘aceb dîvānedir

Hem siyeh-mest-i muḥabbet hem ġazel-ḫān-ı ḥikem

Dürr ü gevher-pāş olur dökdükçe eşk-i çeşmini

Aġlamaḳdandır aña feyż-i firāvān-ı ḥikem

‘Ācizim ḫāmem gibi güftāra yoḳdur ḳudretim

Lākin oldum dest-i iḥsānında gūyān-ı ḥikem

Pes hezārān ‘acz ile Esrār-ı işkeste-ḳalem

Etdi bu na‘tı o şāḥu’ṣ-ṣadr-ı dîvān-ı ḥikem

------

Fā‘ilātün / fā‘ilātün / fā‘ilātün / fā‘ilün